今日沙田賽馬，焦點本應係「國慶盃」，但適逢「精英大師」遠征日本爭短途錦標，世界短途馬王「好望角」扮演配角，今日下午喺東京大戰日本名駒，於是注意力去晒日本，現場轉播之時，先至係今日賽馬高潮。
「精英大師」十七戰十七勝，第十八場跑千六米先至輸條馬頸畀「牛精福星」，第十九場去日本爭千六米之安田錦標，差少少放到，跑第三。今次再到東京，跑短途千二米喎，此程未逢敗績，可唔可以掃低日本馬，為港爭光呢？世界短途馬王「好望角」與「精英大師」喺沙田跑八次，輸八次，照計唔會反先，要驚嘅就係日本馬。賽前論戰，日本隻「金鎮之光」係去年此賽盟主，跑千二米有一分八秒嘅實力，有地頭蟲之利，不可忽視。
英國愛德華王子喺九月二十七日出席沙田馬會會所四樓嘅宴會，馬會主席夏佳理招待貴賓，據夏主席對賓客講，佢對「精英大師」好有信心，已經休息足夠，可以贏得！不過一位對日本賽馬（日本人稱為競馬）有認識人士講，日本馬圈唔想外人贏，每每合作送「包廂」畀外來馬坐，等佢冇得突圍，又或者提早要啲馬出沙圈，行到啲外來馬索氣，周身大汗，精神緊張先至入閘，如果要喺日本贏頭馬，除咗實力外，要有幸運之神眷顧。
跑馬就係要講運，度度一樣。香港兩匹馬，「精英大師」與「好望角」會成為大熱門、次熱門，如果一Ｑ返嚟，香港威晒，日本面目無光，世事冇咁簡單嘅，馬主Ｗ話如果「精英大師」抽到好籤排內檔，有資格由頭放到尾；抽到大外檔就頭痛，因為賽道係出閘不久就轉急彎，外檔馬會「篩」出去，非常不利，而且直路長，有暗斜，後追比較吃力，但就適合「好望角」嘅跑法。
左度右度，除非「精英大師」排第十三檔以外，都係買「精英大師」，打電話叫肥仔Ｋ喺東京入馬場代為落注，希望東京賠率會好啲。點知肥仔Ｋ話唔知中山競馬場喺邊，唔識去！但佢睇到東京馬經報紙，話唱得「精英大師」好好喎。