曹永廉和姜大偉女兒姜依蘭拍拖三年，他表示現時兩人正積極儲錢，希望兩年內結婚，曹永廉說：「等我儲多啲錢啦，我哋一早已經約法三章儲緊錢，錢可以畀到人安全感，買屋又好、擺酒又好，感情需要一筆錢先可以安定落嚟。我入行到𠵱家搵錢能力都幾弱，未試過賺過一筆大錢，次次都係奄吓奄吓，以前有啲女朋友同我分開，唔係因為佢哋需要好有錢嘅男人，而係愛情要講浪漫，食飯、睇戲都要錢，但係呢啲嘢我都畀唔到佢哋，佢哋惟有另謀高就。」
盡數四大優點
問到女友姜依蘭的優點，曹永廉笑說：「第一，我覺得佢好鍾意我啦，佢亦令我好放心，唔會出去蒲識第二個；第二，佢係一個幾精明嘅人，同琳琳姐（其母李琳琳）好似，成日會幫我諗好多嘢；第三，佢係一個好簡單嘅人，成日唔出街都得，我同佢喺屋企睇周星馳影碟、玩吓狗、煮個麵食就可以過一日；第四，我鍾意佢唔鍾意shopping。但其實我好少喺佢面前讚佢㗎。」
家庭篇：父親辛勞胃潰瘍
曹永廉在家中四兄弟中排第三，十六歲時父親生意失敗，全家搬去木屋區，不但冇冷氣，連買風扇亦要儲好耐錢，曹永廉說：「十二、三歲時屋企算係小康，有時會去流浮山食蠔，當時我唔鍾意食蠔，但之後想食都冇得食，我好記得阿爸做嘢做到胃潰瘍入醫院嘅情況，所以希望可以畀屋企人多啲享受，亦堅持每個月都要畀家用屋企，搵到多些少就請佢哋去旅行。我份人雖然慳，但慳自己唔慳人，寧願自己喺屋企淥公仔麵食，但出到去照請朋友食飯，我咁做唔係為咗面子，而係想朋友開心。」
撰文：張止寒
攝影：葉君海
服裝提供：BENETTON&SISLEY
場地提供：花卉食坊
