煲呔上位，噚日係第一次以特首身份出席升旗禮，八方聽聞，班高官前晚個個都唔敢去wet，乖乖哋一早上床，事關早上八點升旗，五點幾就要起身，唔好話唔辛苦。
噚日真係好人齊，煲呔、肥龍、以及明年分分鐘已經退役嘅詩姐姐企晒喺前排，而孫公、馬仔以及葉澍堃就全部由海內外趕返嚟，以示團結。至於唐唐，就因為隻腳受傷嚟唔到。
一入十月好戲連場
八方只見支旗一升起，煲呔即時熱淚盈眶，真係唔知要感謝主先抑或感謝中央先，總之好激情啦。
一踏入十月，過晒啲國慶酒會，煲呔就開始好唔得閒，因為要準備發表佢份萬眾期待嘅施政報告，八方聽聞，佢正閂埋門造車，而其他三司十一局就全面叫停，等佢大哥發號施令，究竟邊啲項目會優先處理，邊啲兩年後先至算。
當然係人都知煲呔志不在此，佢老哥一定唔想只做兩年，所以為咗要有得冧莊，必然會推啲容易見成效嘅政策出嚟，等大家有得鼓掌，啲敏感同爭議性嘅就一切且慢，即係23條唔慌會出台，免傷和氣啦。
至於政改方案，聽講都唔會包括喺施政報告之內。肥龍會等煲呔喺立法會表演完後，先至抬份五號報告書出嚟見人，所謂醜婦終須見家翁，由肥龍做醜人總好過要煲呔接箭，當然做特首都冇得卸㗎啦。
所以一入十月就好戲連場，政治係妥協嘅藝術，肥龍今次出盡渾身解數，煲呔就要盡地一煲，今次係第一次考試，胡主席、溫總理同曾副主席都一齊昅住睇你表演，兩位大老倌真係好自為之啦。六百萬港人出名難搞，雖然中央支持度達十級，都要考吓大家功力夠唔夠。
爆料熱線：29290000、27860099
報料傳真：26239278
報料電郵：[email protected]