噚日係公益金嘅便服日，香港好多機構都響應。不過，由於學生哥要着便服，都要捐二十蚊畀公益金，今年有啲校長索性唔玩，以免窮學生因為冇錢參加便服日而唔開心。
沙田區小學校長會主席冼杞烈話，佢間學校今年冇搞便服日，因為唔想啲攞綜援嘅學生，要辛辛苦苦攞阿媽二十蚊買餸錢。佢重話嗰區學生比較窮，佢見到有七八成學校都冇參加便服日。
聖公會柴灣聖米迦勒小學校長馮家正都話，佢哋今年都冇搞便服日。因為平時啲學生，無論貧富返學都冇分別，但如果參加便服日，就算窮學生有錢捐，啲衫都冇富學生啲咁靚，一樣會令佢哋唔開心。唔知公益金聽完校長嘅意見後，會唔會畀學校有豁免權，唔使每人捐二十蚊呢？
傳真︰2623-9278
電郵︰[email protected]