在中科環保（351）同埋中國環保電力（290）停牌事件影響下，東成控股（735）噚日繼續被拋售，最低見過0.154元，收0.183元，跌16.82％，成交股數1.31億股，金額2217.6萬元。
東成見股價咁跌法，即刻出嚟澄清話睇怕同中科環保的合作計劃搞唔成。經紀陳話，經此一役，東成貨源掟到散晒，就算炒家有心想收復失地，睇怕都唔係一朝一夕嘅事。
另外，十一黃金周將開始，早排積弱的零售股又開始發威，莎莎（178）同卓悅（653）分別升6.11％至3.475元及5.94％至2.675元。不過，經紀黃話佢較鍾情利福國際（1212），一來尖沙嘴新舖初步反應OK，黃金周嘅生意估計唔成問題，二來股價受早前批股集資影響已回軟多時，據講要沽嘅已經沽得七七八八，再係開車發力之時．
利福先排以每股12.55元配股，股價一度跌破配股價，但家陣已經企穩，昨日微升0.41％，收12.35元，成交金額1853萬元。
慕容小初