電影《龍虎門》昨日在橫店開鏡拜神，飾演光頭星的E-Kids成員Tommy即場剃頭，謝霆鋒和余文樂拿着剪刀亂剪他的頭髮，Tommy擔心剃頭會影響歌手形象。
甄子丹、謝霆鋒、余文樂、陳宇琛、E-Kids和監製黃百鳴昨日在橫店出席電影《龍虎門》開鏡拜神儀式，E-Kids成員Tommy更即場舉行剃頭儀式，謝霆鋒和樂仔揸住剪刀亂剪Tommy的頭髮，黃百鳴更出動菜刀，十分嚇人。
Fans留言發癲
Tommy表示他飾演四小將中的光頭星，所以要剃頭，他說：「頭先我好驚㗎，亦有少少唔捨得，阿媽都話我為咗呢套戲咁大犧牲，啲fans知道我要剃頭，重喺我嘅網頁度發癲。其實做歌手係應該注重形象嘅，我都驚會影響形象，不過為咗部戲犧牲都冇所謂啦。」
樂仔自言第一次在橫店拍戲，因為他有潔癖，所以帶備枕頭和被鋪等貼身用品，他說：「我噚晚瞓覺時先發覺唔記得帶我聞開嘅香薰，搞到成晚瞓唔着，要兩個禮拜後返香港先攞到。」
謝霆鋒深閨
橫店附近有很多夜店和色情場所，樂仔表示收工不會出街，他說：「費事行過又俾人話我唔知做啲乜嘢，得閒咪練吓新歌囉。」
謝霆鋒亦表示不怕狗仔隊跟蹤，他說：「我嚟過橫店好多次，上次都留咗成個月，我係唔介意悶嘅人，成日留喺屋企唔出街都得，咪打吓機寫吓歌詞囉，我好享受寧靜嘅生活，有時間都多啲練功啦。狗仔隊要嚟跟咪跟囉，反正我生活正常，開工、放工、瞓覺，日日都係咁。」
採訪、攝影：曾小嘉
