煲呔上星期喺珠三角威盡之後，原來重有下文。大家都記得八方寫過馬時亨局長同民主黨前主席李柱銘開咗個賭局，賭詹培忠會唔會隨團出發，結果金勞詹出其不意地出現喺大家面前，馬仔就咁輸咗十餐海鮮餐畀馬丁，呢個賭局繼續成為圈內話題。
馬局長話，馬丁使橫手叫李鵬飛出馬游說潮州怒漢，但係馬丁就話佢冇咁低莊。為解羅生門，八方問飛哥點解佢咁好牙力，可以說服金勞詹轉軚，最後一分鐘加入立法會訪粵團。
飛哥力勸 京官急電
飛哥話自己梗係希望說服佢入團啦！始終都係立法會第一次返內地，少咗老詹就好可惜喎，反正金勞詹都係去緊旅行啫，冇乜緊要嘢做，去少一兩日又有乜所謂？
不過飛哥否認係有中方人士叫佢出手，搵老詹只係因為同佢夠老友，希望可以幫手成全個訪問團，佢只係同老詹傾過一次，分析形勢，希望佢明白今次訪粵同煲呔冇關，無論做布景板又好、做配角又好，始終係第一次活動，點都唔好同中央對立啦！
金勞詹最後聽咗邊個勸八方唔知，但係佢自己就誇口講過，有中聯辦以至北京官員打過長途電話畀佢，曉以大義，而最後重有一封來信，佢想唔做識時務嘅俊傑都唔得。但係，煲呔今次好忍得手，冇打電話畀阿詹，所以當日一見到佢出現就話：「詹叔，我𠵱家好冇面呀，好彩你嚟。」金勞詹即時接口話：「唔怕冇面，你有權。」於是煲呔即時約金勞詹喺施政報告後食飯，老詹開一個條件，兩個人食，人多唔制。
好，講番馬局長輸嗰十餐點食法，堂堂局長，馬仔一定唔會唔認帳，況且佢輸得好開心，何解？八方估佢最近接咗新任務，就係負責統戰白鴿黨，佢同馬丁又係樓上樓下街坊，請食飯好閒。
聽講馬丁同馬仔講，與其咁麻煩約齊班聽者有份者食十餐，不如食一餐算數，餘下九餐折現，將啲錢捐畀白鴿黨。問責局長捐錢畀政黨？馬仔梗係未答應，點知煲呔點睇㗎。至於去邊度食大家亦意見多多，有人就要馬仔去幫襯「有骨氣」喎。
馬仔個福建金融團昨晚回港。知情人士話，第一餐已經訂咗喺十一月四日食，馬丁、老詹、飛哥係台柱，其他五十八位議員都有份，鯉魚門老地方見喎。
傳真︰2623-9278
電郵︰[email protected]