舒淇前晚與緋聞男友張震穿上黑色情侶裝出席電影節活動，二人不時細聲講大聲笑，更大方挽手合照，並未因緋聞而避忌。而一向鍾愛HelloKitty的舒淇，近日連座駕車牌也套上HelloKitty鐵框，違反了交通條例也全不知曉。
前晚在觀塘Palaceapm戲院舉行「香港亞洲電影節2005」開幕儀式，特別選侯孝賢執導、舒淇和張震主演的台灣電影《最好的時光》，及楊愛謹（Miki）與李璨琛主演的《b420》為開幕電影。近日有傳舒淇與張震因合作《最》片擦出愛火花，二人前晚在緋聞傳出後首次公開碰面，不但不感尷尬，還不約而同穿上黑色情侶裝，認真合拍。
短訊傳情
大方主動挽手合照
舒淇前晚穿上價值約五萬元的LV黑色晚裝赴會，剛巧張震亦以一身黑衣上陣，二人在台上一見面即雞啄唔斷，有講有笑，當記者要求二人蹺着手合照時，舒淇即二話不說主動挽着張震的手臂，表現相當大方。
不過舒淇和張震事後接受訪問時，均強調事前未有與對方夾過衣着。再問舒淇跟張震談些甚麼令她如此開懷時，她笑說：「之前佢去加拿大電影節做評判，我問佢啲戲好唔好睇啫。大家好耐冇見，咁耐冇見就梗係會雞啄唔斷㗎啦！」
問到二人傳出緋聞後，舒淇可有跟張震聯絡？舒淇說：「我send過短訊畀佢，話唔好意思拖佢落水，但張震send番短訊畀我，話『習慣啦！沒關係！』」
擇偶條件
只要相愛再無所求
問舒淇傳出緋聞後再與張震見面可感尷尬？她說：「點會尷尬？自己傳過嘅人都好多，我其實同張震識咗六、七年，我鍾意嘅男仔，我見到佢時要有心跳感覺，但當時見張震冇呢種感覺，而且我唔鍾意細過我嘅男仔。」
當記者告訴舒淇張震與她同年出生時，她驚訝地說：「吓？係咩？咁佢應該細我幾個月，或者幾年後佢成熟咗會有機會啦，到時我咪話畀你哋知囉。」
而張震亦強調再次與舒淇見面不會感到尷尬，問他選擇女友的標準時，張震以國語說：「我沒有特別要求，只要她愛我，我愛她便可以。」雖然張震否認跟舒淇拍拖，但坦言覺得她是一個相當有魅力的女孩子，張震更語帶保留地說：「將來的事沒人知道。」
此外，舒淇在開幕禮後乘坐其座駕返家，一向鍾愛HelloKitty的她，除了車廂內放滿HelloKitty飾物外，連車牌也加上HelloKitty的鐵框，不過根據香港交通法例規定，車牌必須清楚顯示字樣，舒淇在車牌上加上HelloKitty鐵框，觸犯了「未能清楚顯示車牌」條例，想不到舒淇為了愛HelloKitty，連觸犯法例也不顧。
採訪：何永寧
攝影：何榮亮、娛樂突發組
