港股在9月份最後1個交易日，埋單指數變化唔大，國企股個別升勢比較明顯。國際銅價先幾日創歷史新高，江銅（358）大搶風頭，最高4.475元，收4.375元，進帳2.3%，係第3大升幅國企股。
江銅C輪4742：4742飛沙走石，前日收17.9仙（當日已升47%），昨日最高35.5仙，幾個鐘頭升幅接近1倍，埋單價27仙，摸頂價上車者即時坐艇24%，前晚收市上車者仍賺50%，高高興興過周末。
4742前日街貨量5.5%，即係8.3球，昨日成交131球，係街貨將近16倍，真係咁多人炒即市？唔明何以熱得咁交關。隻輪年底到期，溢價17.7%，槓桿率16.2倍（有效6.4倍），引伸波幅51%，你買埋我份。
真係睇好江銅買C輪，4759實際好多，輪價35.5仙（昨升11%），今年11月下旬到期（較4742短命5個星期），溢價4.1%（較4742慳番13.6個百分點），槓桿率12.3倍（較4742只係輸蝕唔夠3成）。
答客問滙控C輪：讀者紀先生問滙控C輪4919與3871，應如何比較。
4919明年3月31日夠鐘，輪價29.5仙，溢價5.3%，槓桿率42.8倍（有效15.8倍），引伸波幅14.1%。3871明年3月28日到期（與4919差唔多），溢價4.4%（着數過4919少少），槓桿率71.3倍（勁過4919好多）。
睇好滙控博大堆，3871抵買過4919，爆炸力強好多。不過如果滙控走勢唔對辦，則揸3871會輸得勁過4919多多聲。
章盛