當大家坐喺一碗極品魚翅之前，流晒口水，慢慢食之際，有冇諗過，魚翅係鯊魚嘅魚鰭，而好多魚鰭都係漁民喺個海度監生劏返嚟嘅。所以當一條條美味魚翅落入各位嘅肚裏面時，一條條無辜嘅鯊就因為冇咗個魚鰭而沉死於大海。
不過，凡事總有相反意見，香港海味雜貨商會主席麥澄波就認為鯊魚死有餘辜。佢話，有人打住環保旗號，煽動大家罷食魚翅，係一種極其偏激嘅行為。
佢又話，如果連唔係瀕危品種嘅鯊魚都唔畀殺嘅話，咁豈不是成海都係鯊魚？商會甚至認為，殺咁啲鯊魚可以令個海安全啲，魚翅又有營養，直情係造福人類㖭。
唔知到時麥澄波上到立法會討論保護瀕危物種條例草案嘅時候，見到班環保界人士，會唔會話不投機半句多呢？
傳真︰2623-9278
電郵︰[email protected]