Karen衝入房大聲問我係咪Pinky，兇狠嘅態度嚇到我唔識反應！Sabrina同我解圍：「佢係我表姐Josephine……」Karen面都紅晒，立即道歉。我心諗，佢點識Pinky？點解估我係Pinky？見到Dennis盒朱古力所以咁諗？咁緊張，唔通佢同Dennis有關係？後來費事尷尬，我冇追問落去。
離開Sabrina屋企之後，因為頭先件事搞到個人好攰，要諗啲減壓方法先。其實疲勞都分兩種：體力疲勞同腦力疲勞。如果屬體力疲勞就會四肢無力、肌肉痠痛，這時最佳方法係沖個熱水涼、用熱水浸腳然後瞓覺，或者嚟個全身按摩都得。不過今次明顯係食慾不振、記憶力同集中力下降，我就知自己係腦力疲勞。不如就用少少時間做簡單運動，好似散步、打波、跳Aerobic咁。最後，我選擇行路返屋企當散步，行咗五個地鐵站嘅距離，感覺真係放鬆咗。（十）