由葉偉信、甄子丹同雷宇揚聯合導演嘅電影《龍虎門》今日正式開鏡，謝霆鋒做王小虎、甄子丹做王小龍、余文樂做石黑龍，佢哋噚日聯同董潔、黃百鳴、施南生同原著作者黃玉郎一齊喺上海喜來登酒店舉行記者會。
拍戲會加護墊
黃百鳴話套戲投資一千萬美金（約七千八百萬港元），甄子丹重話會報名出年嘅康城影展，所以今年十二月就會拍完，元華亦會參演一角。
余文樂喺戲中要耍雙節棍，門外漢嘅佢雖然有拜師學藝，但係早排練習嗰陣就唔小心打襯自己嘅下體，𠵱家有啲紅腫，但冇睇醫生，樂仔話正式拍嗰陣會喺重要部位加保護墊，以防有差池。
而謝霆鋒亦喺戲中有好多打鬥戲，佢話之前自己有兩隻手指因為拍戲受傷屈唔到，𠵱家成日要練功所以搞到傷勢加劇，睇咗好多次醫生都重未好。