到福記食飯，碰到唔少朋友，其中有船運Ｃ在，船運Ｃ間大寶號與一間銀行同名，船運Ｃ曾經想過反對銀行名稱，但佢做船運，人哋做銀行，買入銀行之後改名，啱啱同佢間船公司相同，好似冇乜反對理由，諗深一層，於是作罷。
船運Ｃ平時素來低調，去年突然問左丁山：「我想捐錢，提倡儒學，𠵱家個個捐親錢都以醫學為主，我認為醫人固然緊要，醫道德、醫人性亦十分緊要。醫科大把人捐啦，我想捐錢資助儒家教育啫。」左丁山諗咗一輪，推介航運Ｃ捐款支持「中華美德教育行動」第三屆培訓啦。船運Ｃ收到主辦單位電話後，二話不說，捐咗三十萬；今年第四屆，另有「有心人」捐咗三十萬，於是船運Ｃ捐咗五十件Ｔ恤畀五十位參加者，一人一件，重講明，如果唔夠錢，佢會再捐。
呢位「有心人」甚為傳奇，除做生意賺錢，每年捐錢之外，佢去拉斯維加斯經常贏大錢，聽講最近一次，贏咗幾百萬美元，重威過詹培忠，詹議員贏大錢就住靚飲靚食靚，豪氣逼人，一擲萬金毫無懼色。呢位「有心人」贏咗大錢，返到香港就額外捐多啲，教育學院受益不少，「全球華文青年文學獎」得佢大力支持，「中華美德教育行動」培訓班由中文大學新亞書院與北京東方道德研究所合辦，向來自內地八省兩直轄市之十四所小學、十六所中學、五所教育學院、四個政府教育部門等等等共四十七位學員，灌輸傳統道德觀念，今年嘅主題係「誠信」，誠者，天之道也，錢遜教授（錢穆先生之子）講誠信話：「市場經濟建基於誠信上，沒有誠信也沒有市場經濟。」
錢教授講得好啱，內地學人講市場經濟，但唔少人製造假貨、冒牌貨、毒貨、污穢貨，害人不淺，內地政府無法根絕。點解會咁？皆因中國有太多商人不知誠信為何物也。船運Ｃ、「有心人」捐錢支持呢類培訓班，直情對中國未來發展有大貢獻。