噚日有兩間新公司公布招股詳情，一隻係榮智建個姪榮敬信有份話事、由明報分拆出嚟嘅萬華傳媒，一隻係獅城過江龍、響中港澳獨家代理名表FranckMULLER嘅先施錶行。
先講個公司冧巴，兩間公司都冇捐錢買指定靚號碼，做雜誌嘅萬華，冇雙花冇紅棍，但抽到江湖味極重嘅426，睇怕佢哋啲老外管理層都唔會介意，而賣表嗰間呢，就抽到444，但唔使驚，因為上海話嚟講，係解喜喜喜，意頭好到極！
再講兩個記招，前者唔知做乜要響中午十二點開，冇招股書冇新聞稿，淨係得型爆嘅榮敬信，所以冇乜好講；而後者呢，有靚model有靚表，有極有男人味、一手將FranckMULLER引入香港嘅Kevin周國勳同你講表，三個字講晒──有品味！
Kevin唔肯講佢哋一年賣出幾多隻FranckMULLER，淨係話啲表售價由三萬八（最平嗰隻入門版）到五百萬（限量版），咁唔係咁多人買得起最貴嗰啲，所以大家可以估吓邊啲最好賣然後用五億幾嘅營業額自己除。可惜周生話Franck唔會出席上市儀式。
傳真︰2623-9278
電郵︰[email protected]