昨日有上市公司被廉記調查，今次竟然係有太子黨背景的中科環保（351），同埋有小小關連嘅中國環保電力（290）。江湖傳聞中科環保剛剛想發力，就即刻爆單咁嘢出嚟，都唔知係話佢黑仔，定係讚執法機關英明。
根據傳統智慧，次次三四線股有親呢類消息，細價股通常都冇運行，好似先前熱炒，同埋剛剛供完股嘅東成控股（735），噚日就一度急跌至0.208元，收市雖然抽番上0.22元，但仍跌24.14%，成交股數1.55億股，金額3664萬元。
經紀陳話，昨日仍然停牌的中新集團（563），公布會花5億幾銀買入大股東喺北京嘅兩個地產項目，按每股0.52元向大股東發行新股支付。而江湖傳聞有經紀行想藉近期大陸地產股熱潮，幫中新批股集資。
中新近期由0.50元升至0.60元水平，升幅話多唔算多，話少唔算少。據聞有炒家準備在中新復牌後大展拳腳，隻股貨源都算幾疏，要炒上冇話唔得，但氣氛就唔就，則係另外一回事。
慕容小初