蔡卓妍（阿Sa）雖然工作多、賺得多，但經常受病魔折磨，早前病足三個月，故Sa媽不只狂煲靚湯及燕窩給愛女進補，還要阿Sa服調理荷爾蒙的藥丸，結果令她有再發育迹象，阿Sa還笑說：「遲啲個胸可能會變大。」
蔡卓妍的工作量一向十分驚人，雖然得到金錢回報，卻財多身子弱，有時她會忽然肚痛或頭暈，近期她更病足三個月，令到本來已纖瘦的她再掉六磅肉，體重僅得九十八磅。
鯨吞美食不長肉
阿Sa日前在銅鑼灣接受訪問時表示近來患上感冒，兼且腸抽筋及荷爾蒙失調，飽受病魔蹂躪，即使每天鯨吞美食也沒有長肉，阿Sa說：「呢排病係因為感冒開始，啲感冒菌好勁，我由細到大腸胃好易敏感，壓力大就會腸抽筋，所以瘦咗成六磅，告別大臉嘅日子。其實我都食好多嘢，但唔係咁吸收，我有做過身體檢查，又冇問題呀，𠵱家惟有壺不離身，都係媽咪煲嘅燕窩同湯水。」
除了感冒與腸胃問題外，阿Sa亦有少許荷爾蒙失調，她說：「媽咪要我食荷爾蒙丸，食咗兩個禮拜度啦，係好咗少少，但遲啲個胸可能會變大。」問她會否覺得身材比前好了？她即哈哈笑說：「好啲。」
事實上，阿Sa賺了名利卻輸了健康，問她有沒有財多身子弱的感覺？她說：「財唔算好多咋喎，比起好普通嘅普通人多啲啫。」
辛苦讓父母安穩
才二十二歲的阿Sa已經有車有樓有積蓄，但她說：「呢樣係開心，起碼可以令爹哋、媽咪生活愉快，有時唔係只睇有錢冇錢，最緊要開心，一家人都好。」
至於感情方面是否同樣愉快，阿Sa即時耍太極，對所有相關問題只回答三個字：「唔回應。」
採訪：朱倬誼攝影：陳偉權
服裝、長靴：SistyrMoon
（牛仔褲、紫色背心及銀色高跟鞋為私物）場地：Habitu
