煲呔嘅政治手腕，真係估唔到咁犀利。有人對八方爆咗個小秘密，話煲呔好鬼緊張外界對佢嘅意見，一有乜嘢依郁，就第一時間親自打電話畀「異見人士」，希望可以令佢哋回心轉意；至於下屬有問題，就更加唔留手，除咗收電話之外，重會收到「醫貓」，叫你醒定啲。
以下都係真人真事。一位名不見經傳嘅區議員，對傳媒呻咗兩句政府不是，翌日竟然收到煲呔來電，要親自了解事件；區議員最初聽到係煲呔都唔信，點會估到堂堂一個特首，會咁得閒打電話畀自己啫，結果呢位區議員，就因為個電話冧咗幾日，早前嘅不滿，當然拋諸腦後啦，日後更加唔會咁多嘢講。
另一個例子係尊貴嘅立法會議員方剛，佢早前喺報紙投稿，批評煲呔處理四川豬反應慢，聽講煲呔一打開張報紙，就馬上搵人接通方議員嘅辦公室電話，向方剛詳細解釋事件緣由，其實佢已經做咗好多工夫云云。方議員當時真係有啲受寵若驚，勢估唔到個特首會咁早打電話畀佢。自此之後，就好似唔見佢向報館投稿，可能俾煲呔感動咗。
最經典嘅，就莫過於有個別官員，因事引起煲呔關注，佢老哥二話不說，攞起個電話就打畀個官仔，講完一大論高見後，個官重蒙查查，唔知邊個咁夠膽教佢做嘢，點知對方喺電話筒大叫過嚟話，「喂！你知唔知我係邊個，我係你特首。」一聽到呢句，個官仔成個彈起，差唔多想行個禮，講句Yes,Sir!
老董唔再多聲有風度
唔講唔知，煲呔重有一樣秘密武器對付啲唔知死嘅手下，就係直接發出電郵，叫你趕快做好單嘢，唔好影響公僕形象，然後同時cc畀你老頂，結果問題梗係好快解決。煲呔覺得此舉甚為有效，本來繞過司局長唔係幾啱規矩，但係久而久之，大家都慣咗直接收指示，就算啦。八方問特首辦煲呔每日打幾多個電話同發幾多電郵，佢哋反問：點會知？當然老細鍾意同下屬溝通，邊個有佢符。
煲呔親力親為乜都親自郁手，老董直情拍馬都追唔上。但老董最可愛之處，就係佢夠厚道，𠵱家不在其位，就唔再指指點點。好似佢上星期出席民建聯私人活動時，有人問過佢點睇東南九龍建政府總部嘅事，佢堅決拒絕評論，重話有信心煲呔會搞得掂，都算佢有風度、有修養。
傳真︰2623-9278
電郵︰[email protected]