唔升唔升，1升就嚇你一驚。期指結算日，恒指彈升209點。中移動（941）、中海油（883）、滙控（005）、和黃（013）與中銀（2388）等5大天王，總共拉動恒指137點。恒指收15431，距上月高位15509有78點。搵輪炒，先鎖定落後藍籌，然後向相關C輪埋手。
新地C輪3906：新地（016）升幅0.5%，細過恒指是日1.4%升幅。本周一賣地前1日，新地最高造82元，𠵱家80.50元，低咗1.50元，恒指3日夾埋則升逾150點，有追上去潛力。新地高價奪取牛池灣地皮，唔應該係阻止股價上升嘅理由，除非大市跌番落去。
計數搵新地C輪炒，不妨瞄準3906，年底到期，輪價45仙，溢價2.5%，槓桿率17.9倍（有效10.6倍），引伸波幅23.1%。
國壽C輪4702：3大國內保險股，中財險（2328）升5.9%，平保（2318）升3.4%，國壽（2628）最慢，升得2.6%。國壽值得追落後，揀國壽C輪短炒可也。對象係4702，明年1月中夠鐘，輪價32仙，溢價7.9%，槓桿率18.6倍（有效9.1倍），引伸波幅28%。國壽C輪中，交投最熱鬧係佢，轉手245球，睇錯正股都唔怕無法甩手。
章盛