一連四日嘅「創新博覽會」噚日揭幕，逾百參展商聚首一堂展出最新發明，八方繞場一周，發現唔少科技產品既實用又富娛樂性。
其中中大訊息工程系發明嘅「自動人臉識別系統」，除咗可以應用喺身份認證同嫌疑犯搜索外，原來重可以利用系統內嘅相片數據庫，比較吓自己同啲名人、明星嘅相似度。
噚日唔少入場人士都被呢套系統吸引，即場試玩，睇吓自己有冇明星相；陳慧琳、梁朝偉，甚至特首曾蔭權都成為比較對象，而據八方觀察，經電腦分析，唔少港人原來同名人都有一兩成相似。
另外，理大研發嘅輕型四輪車mycar亦都喺展覽場首度曝光，呢架車長度僅二點五七米，重量係一般私家車嘅四分一，但可惜香港法例唔容許微型車喺道路行駛，呢架車暫時只可以喺歐洲銷售。署理財司曾俊華見咁好玩，同理大校長潘宗光齊齊試坐。
傳真︰2623-9278
電郵︰[email protected]
