身高五呎二吋的鄭融雖然長得嬌小玲瓏，但勝在骨肉均勻，日前她為師姐陳慧琳擔任代言人的Dada時裝店示範新款秋冬女服亦別具味道，鄭融表示現正學習穿衣的最高境界，玩平衫貴貨crossover來穿出個人風格。
鄭融日前為同門師姐陳慧琳擔任代言人的Dada時裝店，示範旗下Dadagirl的新款秋冬服飾系列，雖然身高五呎二吋的鄭融個子嬌小玲瓏，不過因她身形均勻，故擔當模特兒也相當適合，別具一番韻味。
自信十足
當日鄭融合穿上多套服飾，有懷舊、高貴、淑女、富玩味的都有，她表示自己一向有購買該品牌的服裝，尤其是窩釘tee及獨特剪裁的衣服更屬其心頭好，causal之餘亦十分有型。
對於自己的嬌小身形，鄭融顯得甚具自信，她笑說：「好滿意，望落健康OK冇問題㗎，最緊要身形啱比例，着衫就會好睇啲。唔好攞啲model做標準，好慘㗎，咁會好唔開心，個人健康啲就夠。」
較難買衫
不過，鄭融亦承認有時較難買到合身衣服，她說：「我着衫啲size好細，冬天買褸，啲膊位成日都要改窄，我着鞋都係四號半，買鞋都難，所以平日去街一睇啱就會買。」
問鄭融是否具備時裝潮流觸覺？她即哈哈笑說：「唔係好識，但比入行時好好多，有時都唔係好識襯衫，我覺得着衫嘅最高境界係十幾蚊、百幾蚊嘅衫着出嚟，人哋以為好貴，要好有個人風格。」
鄭融下月將首次推出全新個人大碟，未知會否因出碟而重本置裝？她笑說：「我冇乜錢，我十幾蚊件背心都係咁着，二百零蚊一條牛仔褲，有平有貴咁配搭，我未試過一次買幾十萬衫，行街見到鍾意就買，我諗會買幾萬蚊換季啦。」
採訪：朱倬誼
攝影：陳偉權
服飾、鞋及場地：Dada
