張總自上海返港開壇，為MBA開課，呢日走嚟中環，與眾人開飯；十月將至，大閘蟹甚為應景，問佢在上海食咗蟹未？張總話：「今年睇定吓先，咁多孔雀石綠傳聞，不如等人食咗先，驚冇得食咩？」喺上海食陽澄湖大閘蟹，近水樓臺先得月噃，可以截香港胡。張總話：「陽澄湖大閘蟹已非純種，不必過份期望。上海傳聞甚多，講到近年太多人食陽澄湖大閘蟹，蟹農嘅蟹苗唔夠，去遼東班兵，引入遼東種，放入陽澄湖內，遼東大閘蟹比較強悍，不比江南蟹之溫柔，好快就盡顯雄風，將陽澄湖之雌蟹強行收為後宮妃嬪，所以陽澄湖新產品有啲已經變種，蟹身比較長，但冇原種咁滋味。」
乜咁有研究，食蟹都要講DNA，聽佢咁講，純種陽澄湖蟹快將失蹤，「陽澄湖」呢個品牌失去作用，不過中國漁農未必明白品牌為何物，自毀長城，唔算出奇。
追數王追數成功，因有職業性之好奇心，周圍搵線索去追數，上網係佢專長。追數王話從網上資料得知，荷蘭有純種陽澄湖蟹，佢講：「中國有好多好嘢，已經失傳，譬如唐代服裝、禮儀，要向日本、南韓找尋。冇計啦，禮失求諸野，據我睇到啲網上資料，有華人多年前移民荷蘭，帶去陽澄湖大閘蟹，竟有漏網之蟹，走甩咗，居於荷蘭一啲地下水道，日久繁殖，成為少數產品㖭！以荷蘭人之乾淨、之科學化，佢哋好容易將呢啲野生大閘蟹當為經濟水產，培植出口，中國食家會買番荷蘭純種陽澄湖大閘蟹嚟食！」
講到似層層，呢個古仔連經常在巴黎吃喝嘅張總都未聽過，追數王請大家上網查證，以示佢所言非虛。左丁山對蟹類冇乜興趣，慳番啲時間好過。只想講一句，大閘蟹係極有市場價值之商品，希望中國漁農唔好搞彎晒。