便攜式多媒體播放器喺大家心目中嘅形象，大概都係長方形有個芒加上啲掣咁，最多都係送埋個機座畀用家座枱睇戲用，新意唔多，估唔到呢部iriverU10咁有創意，設計到成部電視機咁，唔單止外形上面贏晒其他PMP，功能重相當齊全，要喺PMP界突圍而出，一啲難度都冇！
記者：梁瑋瑜
攝影：陳偉強
ImageGirl：JoeyMo
大家可能會問，成部電視機咁，帶出街咪好唔方便，點可以話係PMP呢？其實呢部iriverU10嘅電視機設計只係機座嘅部份，部機本身好輕易就可以拎番出嚟，袋喺褲袋或者掛喺頸都完全冇問題，喺屋企用還是拎出街用都一樣咁方便！提醒大家，個機座係要分開購買㗎，不過買得部機，就冇理由唔買埋個機座嘅。
機座當鬧鐘
睇到呢個電視機形機座嘅設計，大家可能已經心郁郁覺得好吸引，咪住！睇埋個機座嘅功能，你一定會覺得非買不可！機座背部有USB插口，方便用家傳送檔案同埋叉電，另外重有Line-In同Line-Out位，可以接駁其他裝置錄音，亦都可以外接揚聲器，而機座背部也有一對喇叭，記者試聽過音質都唔錯，而且夠晒大聲，就算屋企面積大，都唔怕聽唔到；更特別嘅係U10內置鬧鐘功能，而機座頂部就有一個鬧鐘掣，放喺床頭用就最好，呢個設計真係值得一讚。跟機重有一個紅外線遙控，對應機座嘅紅外線接收，放喺屋企真係好似部電視咁用！
多媒體功能齊全
機座功能多多，部機本身又如何？U10擁有一個2.22"、26萬色嘅顯示屏，解像度有320×240，影像十分細緻，而且反差度高，色彩相當鮮明；呢部機支援MPEG4播放，記者試過播片，流暢度不俗，另外重支援JPEG相片，加上幻燈片播放功能，放喺枱面睇相，感覺十分正，唔少得嘅當然係FM收音機同埋錄音功能，不過要留意當部機放咗入機座，就用唔到收音機，呢一點係美中不足嘅地方。U10支援TXT檔案，用家可以用佢嚟睇電子書，另外有兩個小遊戲，其中一個重可以將機裏面嘅相片製作成砌圖，非常之有趣。
SRS立體聲效
PMP有聽歌功能就一啲都唔出奇，U10支援MP3、WMA、ASF、OGG多種類型檔案，而且重有SRS立體聲效，iriverMP3機出晒名靚聲，喺U10上面亦都唔例外。
大家可能會奇怪，U10機面得個螢幕，機身旁邊按鈕又唔多，究竟係點操作部機呢？原來呢部機嘅操作按鈕係隱藏喺螢幕上下左右四邊，只要輕輕咁㩒螢幕旁邊嘅位置，就可以㩒到呢幾個掣，主要係以左右兩邊為選擇同跳出選項，操作起嚟其實十分之簡單，好容易就上手。U10有512MB同1GB兩款型號，不過功能咁多，呢個容量記者就略嫌唔太足夠喇。
Profile
容量：512MB/1GB
電池：內置鋰電池
播放時間：30小時
顯示屏：2.22"26萬色TFT
支援檔案：MPEG4、JPEG、TXT、MP3、WMA、ASF、OGG
尺寸：68.9×46.9×16.4mm
重量：69.3g（不連機座）
iriver（25282166）
