八方呢兩日不時聽到太太團話要去四季酒店shopping，原來郭炳湘太太郭李天穎（Wendy）同著名印度設計師Mrs.BinaModi合作，今明兩日喺四季VictoriaRoom賣人手刺繡高級服裝，並將總收入嘅一成捐畀「生命熱線」。買衫又可以做善事，一舉兩得，郭太重會到場幫手。生命熱線係非政府資助嘅機構，除咗贊助人、巿民捐助外，就要靠自己籌款運作，每年都有兩萬幾人致電熱線求助，都幫助唔少人。
八方噚日同Mrs.BinaModi傾咗幾句，佢話今年係第八次來港，早已經吸引到一班城中有品味嘅太太，好似朱玲玲、JoyceMa同郭志怡咁。佢話自己做咗設計超過十年，走東西方交融風格，只用最天然嘅材料，好似真絲、棉咁，再以全人手釘上細膩刺繡，由三千幾蚊嘅披肩，到三萬幾蚊嘅古董布外套都有。BinaModi總部喺印度，有二千員工。
傳真︰2623-9278
電郵︰[email protected]