煲呔做團長帶立法會議員北上，作為班長嘅范太，一直都笑容滿面，因為佢知道班大哥大姐冇得管，只望佢哋自己識做。八方噚日喺國慶酒會見到范主席，問佢今次畀啲議員幾多分？佢話唔會畀分。
至於馬丁讚佢畀長毛發問，佢話其實都係按本子辦事啫，喺香港咁做，喺廣東都一樣，長毛成場都舉手，點可以唔畀佢問呢？
廣東咁好客，立法會係咪應該回請呢？范太一聽回請，就好用心解釋，話正在諮詢緊議員嘅意見，因為佢哋嘅對口單位係廣東省人大委員會，要請都只可以請人大，去到省領導就要由煲呔出馬喇。
今次開咗頭，立會幾時可以自己組團北上呢？范太話好難講，因為煲呔有中央支持，佢自己就重未收到任何通知，睇怕要等吓先知幾時可以成行。
傳真︰2623-9278
電郵︰[email protected]