雖然Dennis放盒朱古力喺我枱頭，但唔覺佢有返工。放工之後就上表妹Sabrina屋企。佢同屋Karen出咗街，我哋兩個就煮嘢食、睇碟，我順便拎Dennis送嗰盒朱古力出嚟同佢邊睇邊食。跟住就入房傾偈，Sabrina同我講起佢去旅行嘅事，聽佢講話唔鍾意食飛機餐，寧願食飽飽先上機。
「千祈唔好呀。上機前、上咗機都唔好食咁多，食小量營養均衡嘅食物就夠。唔好食豆類同埋飲啤酒，因為好容易產生『氣體』，到時又尷尬又令自己唔舒服。」
「咁應該食乜最好？」
「食低鹽、低糖同埋奶類食品最好，蔬菜、水果、麵包等等都唔錯。」
講到一半，就有開門聲，係Karen返嚟。我買嘅蛋糕同埋Dennis盒朱古力都放咗喺廳。其實我未見過佢，正想出去打個招呼，點知聽到佢「呀」一聲尖叫，就衝入房搵Sabrina。
「Sabrina，出面盒朱古力點嚟㗎？」
「係我表姐拎嚟嘅，做咩？」
Karen即刻好大反應問我：「你就係Pinky？」
Pinky？咪係我哋律師行個秘書？點解會咁？（九）
Josephine