開食店，理所當然揀人流最旺地點，然而「三上」卻唱反調，開分店選址於偏靜舊區。正所謂有麝自然香，只要用料新鮮菜式兼夠特別，地點再偏亦有人幫襯；此店有乜絕活？活生生三斤重皇帝蟹，真係唔多見，難怪成為鎮店之寶！
記者：招佩珊
攝影：伍慶泉、陳陶鈞
模特兒：Cat、Ricky、琼（Salvador）
另類選址一於要靜
新店位置其實唔難搵，一出地鐵站口，沿桂林街直行第四個街口，5分鐘就到。不過行腦場行鴨記肯定唔會行經，但亦肯定唔使捱貴租（同旺區相比）。店主鄧生：「開喺人流多嘅旺區又點？做極都分分鐘唔夠畀租，做乜要同人爭呢？」其實鄧生早已在同區偏靜的元州街開了一間日本料理店，今回開分店，與舊店只不過相隔兩個街口，他好謙咁話：「好在有班熟客同街坊支持，喺附近開多間有多啲位，唔使佢哋等位等咁耐，兩邊走都方便打理。」
千元大蟹日賣三隻
兩店的食物大致相同，不過新店就多了個魚缸，放的是少有的活生生皇帝蟹；店內的食材有入飛機貨，亦有向本地供應商攞貨，當壽司師傅出身的鄧生說：「出面無乜舖頭賣活皇帝蟹，難得入到，夠特別，咁咪試吓囉！」嘩！過千蚊一隻蟹，唔係一般街坊消費喎！「出面大酒家賣起碼$30一両，3斤重一隻差唔多千五蚊，我哋賣得算平。」他說開業至今大概20日，已賣出17隻，有時一晚賣唔到一隻，「啲客見到隔籬枱食緊咁大隻蟹覺得得意，於是又叫一隻，最高紀錄試過一晚賣出三隻。」不過，佢話唔係成日都入到貨，每次最多都係入到三、四隻，不時缺貨，有錢都未必食得到，有心試大蟹最好訂定喇。
鹽燒皇帝蟹
$1,080（原價$1,280）
拿上手真係巨型，足有三斤重的皇帝蟹，肉質較爽有口感，蟹腳尤其鮮美，大廚選擇以鹽燒烹調，蟹肉的水份收乾了，不但惹味，而且可以保留蟹原本的鮮味。
三式軟殼蟹反卷$78（前）
三式分別是海膽、帶子及三文魚各兩件，煙韌飯粒及紫菜包住的是炸得香脆的軟殼蟹，雙重口感。
精選反卷──葱拖羅反卷$88（後）
餐牌內有10款反卷，推介以下兩款：葱拖羅反卷內是切件拖羅，質感爽口，面層的拖羅魚茸則嫩滑，一魚兩味。
煎豬軟骨餃子$28
齋睇樣同一般煎餃無異，但一啖咬落𡁻幾下「咯、咯、咯」聲響，原來菜肉餡內有剁成小粒的豬軟骨，少了肉餡餃子的多汁，但多了卜卜脆的過癮口感，煎餃時會加些少上湯，令餃子皮亦有味道，唔點醬油食都得。
地獄汁炒飯$68
地獄汁？怕且會辣到標眼水，試味時只敢舀一小匙入口，少少辣，Ｂ記隻熱浪薯片重辣過佢，反而食到陣陣鹹香，所謂地獄汁其實是加入辣椒煮過的豉油，炒飯時還加入日本豆瓣醬，每粒飯粒都沾上醬油，齋食飯已夠惹味，還有青口、蝦、日本帶子、粟米、雞肉及日本叉燒，食飯夠晒餸。
鹽燒三文魚水撥$28
水撥即魚骹，由於這部份郁動較多，因此肉質滑中帶爽，骨少，唔使𦧲細骨；燒時只簡單地撒點鹽，務求食其鮮甜原味，魚肉的確夠滑，但略嫌味道偏淡，若然以醬汁燒肯定較惹味吸引。
試味報告
三上日本料理（27766992）
地址：深水埗青山道3?號地下
營業時間：12:00nn?:00pm、6:00pm?:00am
座位：40個，另設4間8?4人VIP房（VIP房最低消費$900起）
