李嘉欣早排搭上有婦之夫、前豐裕興業主席龐維仁，兩人先後多次約會，又喺數碼港過夜，之後嘉欣重公開晒「勝利乳溝」。估唔到話口未完，日前有周刊拍到龐維仁又有新女，報道話佢上星期揸住架寶馬喺銅鑼灣接載一位二十幾歲、長頭髮嘅白領麗人去銅鑼灣香港遊艇會。佢哋先喺海旁談心，之後就入咗私人會所，密會個多小時。
女方急澄清
呢位白領麗人叫做FrancescaHung，喺公關公司任職，早排佢搞咗個活動，都有請埋龐維仁捧場。Francesca噚日主動聯絡馮仁昭回應呢件事，佢話：「件事完全唔係咁，龐生係我朋友，識咗好耐。我嗰晚係拎番上次送嘅coupon畀佢，成班朋友傾吓偈啫。我已經結咗婚，千祈唔好亂寫！咁樣會影響我嘅屋企人。」