賭王何鴻燊與十姑娘何婉琪近年關係惡劣，昨日有報道指十姑娘與美國特工聯絡，大爆賭王的生意內幕。賭王昨日出席中華遊樂會記招時，一語雙關叫十姑娘「去青山吹風」。
何鴻燊昨日在銅鑼灣出席「中華遊樂會網球公開賽」記招，他表示將一如以往參加「150歲以上男子雙打組合」，更有信心再次捧盃。四姨太梁安琪首次參選澳門立法會議員，並且成功當選，他表示已與對方食飯慶祝，賭王說：「一開始就領先幾個馬位啦，我教路叫佢『支持特區政府同特首』。」
「怕佢老人癡呆」
提到昨日有報道指十姑娘何婉琪與美國特工接觸，大爆有關賭王往昔生意內幕，賭王一聞「十姑娘」，即滔滔不絕說：「對佢覺得好可惜！佢只係細我一歲，我就打波、游水同跳舞，佢就可憐到要坐輪椅，唔露得面匿響屋企，我怕佢係老人癡呆症開始。我醫生成日同我講話老人呢，就應該要多啲吹風，好似啲山風、海風咁，我提議佢去青山住吓吹風，嗰面啲海風最好！」
「佢咪大過李嘉誠」
賭王未肯罷休，又針對十姑娘追討所欠股息發表意見，他說：「佢話我阻住佢做善事喎，喂，香港、澳門有邊個慈善家可以捐六十億？人哋捐十億都咁厲害，佢咪大過晒李嘉誠、霍英東呢啲濶佬？捐錢係有受益人，佢捐嚟捐去咪捐畀自己公司，你話六百億都得啦，真係一個巴仙都唔好信！」他強調自己「真心不怕洪爐火」，毋懼被FBI調查。
採訪：何永寧 攝影：陳偉權
