無論你是學生哥還是辦公室一族，相信你都有一、兩樣至愛打氣小食幫你驅走睡魔！但大多數零食都以香口為主，唔夠瞓重食熱氣嘢想唔爆瘡都難啦！想轉口味？不如試吓鹹鹹酸酸的話梅吖！唔講唔知，原來話梅除咗醒神之外，用嚟沖茶更有除口氣功效。
記者：鄺天樂
攝影：伍慶泉
Model：Blanche（Salvodar）
老字號招牌梅
78年歷史：陳意齋話梅王
創於一九二七年的陳意齋，可算是傳統零食店名牌，但價錢就不算便宜，細細包話梅都要成二十蚊先有交易！不過老字號絕對貨真價實，大大粒話梅真係愈嗒愈有味！
售價：$18/35克（約7-8粒）（a）
純正話梅肉
薄薄一片話梅肉咬落不失口感，先酸後甜，十分醒神！唔好睇小薄薄一片話梅肉，一片都可以嗒成五分鐘㗎！
售價：$20/35克（a）
六十幾年歷史：么鳳特級話梅皇
么鳳已經有六十多年的歷史，出售涼果近百種，這裏的話梅甜酸度恰到好處，絕對值得一試！么鳳特級話梅皇分兩種，一種比較乾身，醃製的時間長一點，而另一種有梅粉撒滿整粒梅，味道較鹹。兩款味道口感有別，但就同樣愈食愈甘口，食完重唔會口乾口渴，絕對是一級靚梅！
售價：各$50/両（約6-7粒）（b）
甜：易入口
要數女士至愛，當然不得不提容易入口的甜話梅啦！
特製甜話梅
這款甜話梅同樣大大粒，分別在於梅身沾滿梅粉，入口味道先酸後甜，食完重絕不口渴，有生津解渴之效。
售價：$30/両（約8-9粒）（b）
台灣特大甜話梅
特大甜話梅，梅身較乾，入口甜甜哋，但食落就開始酸，重酸到牙都軟埋，十級醒神，絕對係首選！
售價：$72/磅（$20約28-30粒）（d）
香甜大話梅
正隆行的話梅都是香港廠商製造，絕對唔使怕會食到大陸的工業用料話梅。香甜大話梅入口甜味重，但就食唔出有香味，大大粒嗒到尾都係甜甜哋，啱晒好甜一族。
售價：$32/磅（$8約10-12粒）（c）
鹹酸：最醒神
有時做嘢做到眼都睜唔開時，提神小食真係唔少得！鹹鹹哋一粒話梅再加上少少酸，真係食完都精神百倍！
精選話梅肉
么鳳精選話梅肉一放入口，未咬入口已聞到有強勁酸味，咬落去重牙都軟埋㖭！
售價：$20/両（b）
EDO九製話梅
樽裝話梅方便放在公司食，食完蓋樽蓋就可以輕易保鮮，且價格超值，個樽重可以循環再用，經濟又環保！
售價：$6.9/樽（115克）（f）
話梅王
優之良品話梅王入口微酸，食落味道不太濃味，但較乾身可任你慢慢嗒！可是缺點在於容易黏牙，食起來有點不方便。
售價：$18/包（60克）（e）
另類梅味
話梅糖
么鳳除了賣乾果外，還有糖果零食賣！好似話梅糖咁。話梅糖梅味重，且甜而不膩，最適合愛梅香又怕酸的朋友喇！
售價：$28/磅（b）
甘草話梅
超市乾果小食大阿哥的甘草甜話梅，入口不太甜不太酸，啖啖甘香醒神。甘草甜話梅特別之處在於甘草味道濃，少少甘苦味刺激味覺神經，為怕酸又要提神的朋友提供另類選擇。
售價：$7.8/包（28克）（f）
日式話梅
優之良品的日式話梅加入了日本甘草味道帶點和風味之餘，又不失話梅本色，喜歡嘗試新口味的朋友又有新目標喇！
售價：$10/包（60克）（e）
話梅小百科
其實話梅係用乜做呢？
話梅是以青梅加糖，鹽漬再加丁香、甘草末拌製而成的，可以生津助消化。此外，「話梅」的名稱由來，是因為話梅酸酸甜甜容易生津，當傾偈傾到口乾時，食一粒話梅，飲杯水，除咗提神外亦能補充唾液，所以名為「話梅」喇！
烏龍茶加話梅除口臭
在進食濃味食物後，口氣會特別重，辛苦自己之餘亦苦了別人。其實可以將烏龍茶倒入放有話梅的杯中，飲茶後再將話梅吃掉，食物氣味就自會消失，唔信試吓吖！
售賣點：
（a）陳意齋：上環皇后大道中194號地下（25438414）
（b）么鳳：銅鑼灣富明街3號（25762528）
（c）正隆行：上環永樂街154-158號地下（25488695）
（d）廣良興：旺角彌敦道700號貿易署大樓地下7號舖（23915789）
（e）優之良品：旺角西洋菜街154號（23939620）
（f）各大超級市場