馬時亨噚日帶本地金融界出發去福建，原來佢旗下負責金融同證券期貨政策嘅財經事務及庫務局副秘書長盧古嘉利，已經調走咗，由創新科技署副署長郭譚佩儀接任，變咗由郭太陪肥馬出發。聽講盧太𠵱家放緊長假，處理家居裝修事務，稍後就有新任務。郭太同盧太都有一個共同之處，就係都做過禁毒專員。唔通財庫局有大毒草，要搵做過禁毒嘅AO出馬？
話時話，馬時亨上任三年，旗下財經事務科嘅副秘書長，真係好似走馬燈咁。最先係區璟智，而盧太就做咗唔夠兩年，原本忙住籌備今次福建訪問團，𠵱家咁快走人，可謂功未成身已退。至於郭太雖然以前未做過財金部門，不過聽講佢老公係投資銀行家，係瑞士信貸第一波士頓董事總經理Chester郭淳浩。Chester舊年底向政府提交意見書，建議增設納稅人功能組別，以交薪俸稅愈多票愈多作為投票基礎，不過似乎政府冇接納。
傳真︰2623-9278
電郵︰[email protected]