傅天穎（奀妹）七月底時在台灣誕下兒子陳玄宇，兩夫婦視BB如珠如寶，常替愛兒影生活照。奀妹謂希望囝囝將來做醫生，造福人群，為了賺奶粉錢，奀妹下月便復出幕前，並為產前拍下的電影宣傳。
傅天穎七月底在台灣為夫婿陳子強誕下重七磅多的男嬰，為他取名陳玄宇。產後的奀妹全職照顧囝囝，雖然這是他們的第一胎，但奀妹已有照顧小表妹的經驗，故湊仔對這位新任媽咪來說可謂易如反掌。
沖涼最麻煩
奀妹將於下月八日在台灣為囝囝擺百日宴，她日前說：「產後嗰個月，我一直住喺畀產婦坐月嘅醫院，直至坐完月先同BB一齊返屋企。」奀妹又說：「講到湊BB，我就叻過老公，通常都係分工合作，我餵奶，佢掃風，同BB沖涼就要夾手夾腳，因為一個人真係搞唔掂。」
陳子強曾大讚囝囝陳玄宇的「何B仔」巨大，奀妹笑言：「我哋幫BB影咗好多寫真集，等佢大個咗可以拎嚟留念。」奀妹覺得囝囝的臉形像爸爸，一對大眼睛則像她。
做運動減肥
問奀妹對囝囝有甚麼期望？奀妹說：「我最想佢大個咗做醫生幫人，不過如果佢真係冇興趣，咁就由佢自由發展啦。」奀妹表示懷孕期間，夫妻二人的身體齊齊暴脹，故產後奀妹急不及待跟夫婿每天拍拖做運動減肥，且她已定於下月復出，為產前拍下的電影宣傳，努力賺囝囝的奶粉錢。
採訪：比華利
