高達為題材嘅遊戲，真係數完十隻手指，再加埋腳趾都數唔晒！今次走上PSP上推出嘅《GUNDAMBATTLETACTICS》，玩家可參與至經典一年戰爭，並且可選擇投入聯邦或自護兩大陣營，以自創角色或動畫主角出戰，玩家除咗有機會參加各場大戰外，更可以透過PSP無線機能，最多４人同時打餐飽；不過最重要嘅，係好多高達迷都話佢嘅戰法好有街機《高達ＤＸ》Feel，手提機嚟講絕對係首次！
記者、攝影：許福合
睇番唔少機迷網上評論，對《GUNDAMBATTLETACTICS》讚同彈都幾集中，讚嘅有遊戲內已經包括一年戰爭大部份機體同人物，感覺就好似玩緊《高達ＤＸ》一樣，加上同一作戰畫面，最高可以同時有４部機作戰（都未計天空上飛吓飛吓嘅戰機），絕對係挑戰手提機處理能力嘅極限，所以一眾高達迷真係滿意到爆燈！唔滿意嘅地方主要係流暢度唔夠，甚至有部份場景會有爆格或機體卡住嘅現象。整體上耐玩度高，音效方面亦做足功課，高達迷絕對不能錯過!
自護與聯邦之戰
故事背景係一年戰爭，不過亦加入小量《08小隊》劇情，令整體世界觀更壯大；登場人物有大家熟悉嘅主角如阿寶同馬沙等！而陣營亦係經典嘅自護與聯邦軍激鬥時期。
基本一開始遊戲，玩家必須要用自創角色（有男?女可選）開始，由於開初只是一名小兵，各樣能力值都唔高，能選機體亦只有吉姆同渣古等「二打六」MS，感覺真係幾難打吓，隨住遊戲發展，經過一場又一場戰役，角色的各樣能力值同官階會不斷跳升，而且中間重會有著名的機師如亞寶及馬沙等出現，俾大家選用！
不過就記者打機經驗，都係選女角着數啲，因為男的主要能力是格鬥，女性角色能力在射擊，到愈後的排數多以保命第一，槍擊能力高當然有優勢啦！另外提吓大家，通過一場又一場的戰役，玩家可以贏得好多新MS機體，不過有些機體是需要由自創人物出場先攞到㗎！記者先用亞寶爆聯邦，發現有幾部機體未攞到；之後再用自創角色翻打，先至攞齊，所以大家必須要留意！
連線NPC勁好打
同好多PSP遊戲一樣，無線功能都係遊戲主要賣點，《GUNDAMBATTLETACTICS》亦唔例外，雖然睇落無咩新意，機迷都會估到可以玩咩！同一時間最多可以４人連線，一般可分為合作或對戰模式；合作模式主要係最多由２名玩家，一齊合作完成Game內Mission，不過電腦NPC明顯較單機版時強咗好多，而且亦喜歡用「同歸於盡」打法，極富挑戰性。
至於對戰模式，同一時間最多４人連線對戰，玩家可以掹人組Team，又或者４個玩家擁有各自的陣營，嚟一個大亂鬥，感覺真係幾爽吓！至於使用無線對戰時，流暢度都算可接受，只要唔走太遠，都唔覺出現窒吓嘅窒吓嘅情況。而鍾意玩對戰模式，就記得將操控轉換為TypeB，按掣設定會同《高達DX》好相似，基本上唔使經過熟習，一開始就可以埋牙肉搏！
大量原創機體
遊戲出現大量自護及聯邦機體，有啲大家曾經見過，但亦有些屬原創，例如一隻RX-79(G)，就係吉姆頭加RX-79身嘅變種，此機曾在《08小隊》中出現！類似變種機體重非常多，只要各位能以最佳成績完成各版任務，就有機會拎晒全部機體。
各種機體除咗個樣唔同，攻擊方式其實都有所不同；大家選MS時要留意機體的必殺技屬於遠攻定近戰型，若以遠程必殺技於埋身戰時使用，結果是有機會打空，相反亦然。咁多機體，以肩炮搭激光槍的MUDROCK最好用，配合埋佢嘅高機動性能，好多人爆機都靠佢；就個人喜歡，是自護軍的老虎系列，埋身技超強，三劍打Down敵人後，重可以用電鞭將敵人拉起、再斬三刀，一般二打六角色，絕對一招了！
遊戲資料
主機：PSP
開發：BANDAI
類型：動作
人數：１-４人
售價：$330
DreamStore（25753285）
香港灣仔東方188商場256號舖