韓劇《大長今》喺香港播出嗰陣大受歡迎，諗唔到𠵱家喺內地播出一樣咁瘋狂，有一對夫婦就因為爭睇電視而嗌大交，個老婆重要生要死，搞到要去跳河自殺，認真犀利，好彩最後冇搞出人命，唔係就大件事。
爭睇節目炒大鑊
話說住喺南京嘅一對剛結婚冇耐嘅年輕夫婦，平時感情都好好，每晚喺屋企食完飯就會一齊睇電視，點知呢排電視熱播緊《大》劇，老婆晚晚要追睇呢套劇，但老公係超級球迷，咁啱佢老公要睇嘅球賽撞咗《大》劇播出嘅時間，咁兩公婆各不相讓，當然係大吵起嚟，老婆爭輸咗就同老公講：「你要不給我看，我就去跳河。」咁老公就話：「你要去就去。」
老公以為老婆係講吓，所以冇擺喺心度，點知有鄰居走嚟同佢講，話佢老婆跳河自殺，好彩俾人見到救番佢上嚟，搞到咁大鑊，老公梗係唔敢再同老婆爭電視睇。馮仁昭真係服咗長今嘅魅力，可以搞到啲人要生要死。