賣地成績唔曳，3幅地皮AV價（每方呎樓面地價）都超過5000元，將來至少要賣到7000元先至打和。但個市反應就係唔畀面，恒指埋單唔見84點。
以往試過好多次，地產股先跌，過得一陣先至有遲來嘅反應。地產股C輪諗得過。
新地C輪4904：新地（016）奪得牛池灣地皮，股價則向下，低收80.35元，跌1.25元。今朝報章雞乸咁大隻字報道地產商高價奪地，估計新地股價會造番好啲。
揀新地C輪短炒，搏殺格要隻4904，明年1月3日夠鐘，輪價34仙，溢價3.8%，槓桿率23.6倍（有效11.9倍），引伸波幅22.1%。
4904發行量248球，街貨已超過8成（89.5%），驚輪商增發，可以揀9086，數據唔錯，有排都冇條件增發，街貨得12.1%。
長實C輪3893：博長實（001）昨跌1.05元後反彈，揀長實C輪短炒，可選擇3893。
隻輪下月尾到期，輪價76仙，溢價0.1%，槓桿率11.3倍（有效10.2倍），引伸波幅23.2%。
隻輪的確時日無多，但交投旺，唔怕睇錯市時無法甩身。幾乎平水，對正股反應會好敏感，睇啱方向啖啖肉，睇錯方向則啖啖泥沙。
章盛