建築工人葉奇君說：「我做咗地盤都有九年，最近兩、三年開工不足。最初以為係內地預製件整死我哋，直到最近先發覺，打爛建築工人飯碗嘅幕後黑手，原來係世貿嘅《政府採購協定》。」港府於九七年簽署《世貿的政府採購協定》後，造價逾五千萬元的政府工程合約需作全球招標。他認為，《協定》為內地預製件輸港打開缺口。
「以前嘅預製件，全部由本地工人喺地盤度製造。簽咗《協定》後，政府起居屋、公屋嘅預製件全部要公開招標。大陸貨價低者得贏晒，成條青馬大橋都係預製件砌成，成套組件係珠海製造，咁你話本地工人嘅命運會點？」他強調，政府帶頭採購內地預製件後，私人發展商紛紛效法。
「𠵱家起一幢樓，除咗地台同頭兩、三層，三樓以上全部用晒預製件，好似砌積木咁砌，所需嘅建築工人少咗六成。我足足有半年冇工開啦！」
工業貿易署回應：
政府過去五個財政年度，共投入一千四百五十億元作工務工程，平均每年提供四萬一千個就業機會給建築工人。同時，採用本港製造的預製件不符合經濟效益，政府應衡量如何最有效運用納稅人的金錢。