Dennis知我要買嘢就話跟埋嚟，如果對我冇意思點會咁做？朋友都知我揀男朋友奄尖。其實我係咪應該降低要求呢？諗諗吓，除咗冇「車品」，重未發現Dennis有其他缺點。唉！我就係咁猶豫不決。
記得Sabrina就快去奧地利旅行，就幫佢睇吓啲旅行護理套裝，順便買盒蛋糕畀佢同屋Karen。Dennis意見多多，呢樣唔好嗰樣唔好。如果冇佢阻住晒我好快就買完走得。Dennis都知我俾佢激親，「笑番吓啦，你知唔知人笑嘅時候，中樞神經會發出電脈衝，令大腦分泌天然鎮靜劑同埋止痛劑，可以減輕憂慮、痛楚感覺。隨着歡笑而釋放嘅其他物質，重可以改善血液循環、幫助消化，同減輕高血壓㖭。」「啋過你，我冇高血壓。你果然係律師，乜都要有根有據。」Dennis望住我陰陰嘴笑，冇再搭嘴。
第二朝星期六，我要返半晝。返到公司，竟然發現枱頭有盒下個月先正式發行嘅名牌朱古力，上面有張紙仔，係Dennis字迹，佢話好辛苦先問人拎返嚟，送畀我當賠罪。真係俾佢激死！
八）