滙豐前大班艾爾敦月初喺香港總商會（佢老兄係主席）本月刊，寫咗篇文質疑政府喺添馬艦起新總部嘅決定，結果一呼百應，唔少商界、專業人士同民建聯都一齊反對，搞到煲呔幾頭痕。
總商會副主席蔣麗莉噚日代表總商會，主持工商界國慶酒會，班行家順便問吓蔣小姐，添馬艦係咪唔應該起總部，蔣小姐話理事會冇傾過呢個問題。有行家追問蔣小姐，艾爾敦都有寫文反對喎，總商會係咪都要傾吓？
蔣小姐話，主席有佢嘅分析同睇法，暫時冇人提出要傾。但佢講講吓竟然掉轉頭問番啲行家，艾爾敦喺邊度寫文？係咪用總商會主席嘅身份寫？然後又叫行家不如問總裁翁以登！
聽到蔣小姐咁講，有啲行家眼都凸埋。睇嚟總商會以後都要規定啲領導層，務必刨熟自己本月刊，費時要問番記者主席講過乜。
爆料熱線：29290000、27860099
報料傳真：26239278
報料電郵：[email protected]