呢排多咗人都講新股，因為由大至建設銀行、中小型嘅永樂電器，甚至再細啲嘅新股都有招股活動，認真係目不暇給，但唔使問阿貴，無論散戶抑或芬佬，主要目標都放在建行身上，喺咁嘅情形下，難怪其他細價炒股少咗人提及，莊家大戶亦樂得唞一唞。
好彩個別行業仍有芬佬肯留意，好似經紀黃先排提過嘅大陸地產股，就繼續係咁升，好似富力地產（2777）近排雖然有芬佬減持，但股價照樣造好，昨日又升5.71％，收23.15元，再創新高。
至於貨源向來比較疏嘅合生創展（754），股價同樣在昨日創下新高，最高見過9.30元，收市4.62％，收9.05元。
不過，經紀黃話比較睇好上海復地（2337），佢話無論計帳面值抑或PE都好，上海復地都比同類大陸地產股便宜，由於隻股早排曾被芬佬減持，所以股價相對同類股落後，但據聞呢批貨已消化得七七八八，估計可以再現強勢。
上海復地昨日升2.94％，收2.625元，成交股數1103萬股，金額2900萬元。
慕容小初