Ｔ少八年前自澳洲回流，跟伯父打工，伯父年紀已老，喜得年富力強嘅姪仔幫手，自然委以重任，由香港做到東莞，舊年索性叫Ｔ少做埋廠長，伯父自己就多去雪梨休息歎世界。
如此安排，本來好唔錯，Ｔ少平時住在東莞，都唔知幾歎，對左丁山講：「你哋成日踎響香港做乜嘢吖，東莞乜都有，上嚟我帶你去威番幾晚。」點知近來Ｔ少返港，與朋友飲茶，面露憂色，茶飯不思，唔通工廠因為珠三角缺水、缺電、缺油、缺工人，搞到佢哋頭大，故此冇厘心機？
問真啲，非也，滿面愁容嘅，不止Ｔ少一個。Ｋ老闆亦是如此，Ｋ老闆話：「東莞海關要廠商自動上報，過去幾年有冇漏報關稅，認咗漏報嘅要補番稅項，自認冇漏稅嘅，海關會派人到工廠實地查帳。呢勻真係橫又死，直又死，點死法，任揀。認漏報，交番稅之後，唔知有冇秋後算帳；認報清晒，更驚海關查到你失魂，一定查到錯失或漏報，到時廠長要坐監都似，唔止罰款咁簡單。」
唔怪得Ｔ少有排驚，講老實話，廠商在東莞邊會報稅報到水清無魚吖，平時有好多人搵廠商造數講數㗎嘛，大家肯找數就以為冇事，點知呢勻據講話係北京海關總部追稅，要各地海關攤分，東莞係富庶城市，首當其衝，於是所有廠商都頭暈身㷫。
Ｋ老闆話民建聯立法會議員黃定光上咗東莞，替香港廠商說項，希望可以減輕衝擊。但Ｔ少就不表樂觀，佢話：「民建聯識得利用形勢，提升民望啫，做到嘢，我哋會好多謝，下次一定投民建聯一票。不過攤派額外關稅，係北京決定，黃定光邊會講得掂吖。」Ｔ少伯父喺澳洲未知道問題嘅嚴重性，叫Ｔ少用拖字訣，Ｔ少就驚住身為廠長，責任重大。左丁山笑佢：「去東莞威吓咯！」Ｔ少喃喃自語：「我𠵱家想返雪梨吖。」