煲呔成功帶班立法會大馬騮旋風訪問珠三角兩日，餘波蕩漾。可惜民調永遠落後形勢，惟有希望呢個珠三角好勢頭可以保持一段時間，否則就徒勞無功啦。總結此行，煲呔用咗句「進一步海闊天空」，都算創新，人哋只有「退一步海闊天空」，何來進一步？有人就話肯定同佢性格急進有關，總之唔准停、冇得懶。君不見佢剛喺廣州同廣東省省長黃華華見完面，華華哥噚晚又嚟咗香港，準備今日同煲呔開第八次粵港聯席會議，你話邊有咁多嘢傾。
煲呔表現好，配角都有得益。好似身兼支聯會常委嘅白鴿黨成員鄭家富就多得佢唔少，因為自從八六年回潮州祭祖掃墓後，阿富就冇返過大陸；其次，就算返去，以前都從未去過中國教堂，所以今次大開眼界。
阿富同八方認，自己唔係虔誠教徒，事前唔知有呢回事，只係馬丁話煲呔第二朝會去早禱，佢就參加埋一份。於是大家晨咁早六點十五分喺沙面前法租界一間小教堂集合，間教堂好近酒店，不過煲呔仍有專車接送，唔使行。
去到教堂，馬丁怕打擾國內教友，但係班傳媒不時喺窗口用閃燈拍照，搞到阿富成日要奉馬丁之命去閂窗，連同主講嘢都冇乜時間。八方問阿富祈禱講咗乜，佢話第一梗係為祖國同香港祈禱，希望中國好、香港好；第二就真係感謝天父眷顧，因為佢個女今年去咗英國讀中學，最近有信報告近況，話自己𠵱家個個禮拜去教堂，重參加埋歌詠班㖭。個女喺海外生活咁充實，當然亦要多謝主。
華叔造就三贏局面
阿富咁高興，田少就有啲憔悴。八方前晚終於喺立法會門口撞到田少，佢當時等緊同電視台做訪問，於是順便問吓佢經過兩日訪粵團後，係咪同煲呔冰釋前嫌、和好如初？田少聽到呢個問題，就話今日要講珠三角，唔係講呢啲嘢。八方再問多兩問，田少即刻話趕時間要走。周太見到田少想閃，即刻衝前，叫佢等多陣先，唔好咁快走，一定要上鏡。
政圈中人總結，都讚華叔好嘢，如果當日唔係佢老人家鬧醒民主黨，達仔唔會提六四。結果，民主派有差交，張德江有得表演，煲呔重領晒功，好一個三贏局面。八方問華叔點睇，佢梗係唔會認叻，只係彈張書記前言不對後語，一時又話坦誠，一時又話不投機，自打嘴巴。
爆料熱線：29290000、27860099
報料傳真：26239278
報料電郵：[email protected]