噚日係中英草簽《聯合聲明》二十一周年，剛好亦係五十九位特區立法會議員首次獲邀回大陸參觀考察嘅日子。時光飛逝，八方問自認「大鄉里」嘅白鴿黨前黨魁李馬丁，佢話一時都唔記得九二六係草簽紀念日囉。
馬丁今次去珠三角，當然感受良多，白天鵝酒店正正係當年基本法起草委員會開會嘅地方，馬丁、劉皇發同譚耀宗喺呢間酒店留下好多足印，八方都一樣有好多回憶，晨早七點敲李後同魯平嘅房門，晚上同草委食雪糕，情景仍歷歷在目。
馬丁舊地重遊，佢話勢估唔到回歸只八年，港人治港已經玩完，變成京人治港，大事由大曾拍板，小曾只係負責執行。搞成咁，唔知係咪要多謝老董。但點都好，馬丁對此行嘅評價都好正面，重話要讚吓主席范太畀機會長毛向政治局委員張德江問問題。八方聽聞，范太當日已經回請張書記嚟香港一遊，到時大可請佢去聽吓班議員辯論，真正交流吓。
馬丁覺得張書記唔可怕，梁家傑亦有同感，佢話可能記者不在現場，佢自己就好留心觀察，據傑哥分析，張書記一句「話不投機半句多」不但冇關上溝通之門，反而為以後交往定調，即係六四呢啲問題大家冇法一致，你說服唔到我，我又說服唔到你，不如就傾其他民生經濟嘢啦。
先鬧後笑馬丁學到嘢
傑哥又讚張書記得體，重話喺大陸，好難有機會當面挑戰政治局成員，香港人算好威㗎啦，如果唔係中央拍咗板，張書記唔會咁放膽講。對於張德江發官威，馬丁就話當年屢見不鮮，佢成日俾周南黑住口面大鬧，然後放聲大笑，後來都學到嘢，照辦煮碗。
雖然明知俾人監視，馬丁同傑哥都話喺白天鵝瞓得好好，傑哥星期六由西班牙畢爾包飛返香港（本來周五回港，因航班臨時取消被迫滯留，轉由巴塞隆拿經羅馬回來），第二日大清早就上直通車出發，當然攰到死，所以一瞓落床就呼呼入睡，瞓足七粒鐘。
成個團新聞最多嘅長毛，都因為啱啱去完英國考察所以特別辛苦，佢話阿牛本來勸佢杯葛廣東行，因為有個別傳媒好似《蘋果》冇得去，但係佢就認為好難講得通，所以出發之日叫朋友買咗籃蘋果送畀煲呔，諷刺佢辦事不力，後來送唔成就自己食。
爆料熱線：29290000、27860099
報料傳真：26239278
報料電郵：[email protected]