國美電器（493）競爭對手永樂電器噚日晏晝搞上市推介會，國美股價即刻腳軟，一度跌至3.95元的52周新低，收市雖然升番上4.25元，仍跌7.61%，成交明顯較平時高，有成1908萬股，金額7892萬元。
經紀黃話，建設銀行上市，交通銀行（3328）被質，早前神華（1088）上市，兗州煤業（1171）亦被芬佬沽貨，真係次次都靈。其實國美因為邊際利潤下降，早排曾被芬佬沽貨，而今次有競爭對手搞上市，則令跌勢加速。
另外，呢排個別股份公布靚靚業績後，股價都有驚喜，例如早前的萬裕國際（894）同埋合富輝煌（733）咁，股價跟住盈利一齊升，股東當然飲得杯落。經紀黃今次話睇好昨日公布業績的香煙包裝供應商偉誠控股（2300），佢話隻股業績好之餘，貨源夠集中，較容易炒上。
偉誠昨公布截至今年6月中期業績，盈利有6918.4萬元，較去年增長72.8%，派息亦唔錯，除中期息7.2仙外，重有特別股息2.8仙，加埋有成毫子。
慕容小初