「緊啲好啲，咁鬆點得㗎？」八方上周去會展國際珠寶展參觀，行行吓，突然間被一道寶石光芒閃親。望真啲，只見兩名靚女服務員喺度服侍緊尊貴嘅兩會議員周梁淑怡，小心翼翼咁，幫佢戴上又寶石又鑲翡翠嘅頸鏈同手鏈。
非常富泰嘅周梁，估計係趁食晏時到會展兜一轉，順道去相熟嘅攤位入貨。只見佢一面話趕時間，但又對手上嘅珠寶愛不釋手。一時彎低腰，一時照照鏡。儘管周梁對八方話，只係嚟睇吓，但八方最後見周太都揀咗一件首飾，服務員靜靜寫咗個五位數字──14,800（唔知係美金定港紙）嘅價錢畀周梁過目，但礙於八方在場，周梁一面拉住服務員走，一面密密斟，兩人消失在人群中。第二日喺立法會門口又碰到周太，八方問佢買到心頭好未，點知周太猛咁笑話要多謝八方，話幫佢慳番筆錢喎。
爆料熱線：29290000、27860099
報料傳真：26239278
報料電郵：[email protected]