近呢年DC出得太濫，個市都開始滯滯哋，其實廠商都意識到市場欠缺一件「主導產品」推動大市！「靜」極思動，最近日、韓幾間大廠都好似有意力推記憶體式DV！好似三星有部MS插卡嘅SC-X105L、JVC亦有30GB硬碟嘅GZ-MG50，𠵱家連Panasonic都摻一手，下個月將推出全球最細嘅SD插卡3CCD攝錄機──SDR-S100。
細如巴掌大
Pan記呢部機真係細如巴掌大（49.9×80.4×96.7mm），感光元件使用1/6"80萬像素×3、行3CCD，鏡頭重係落重本使用10倍光學變焦LEICA靚鏡，加埋自家開發嘅MEGAOIS防手震技術，規格都算無可挑剔！Movie解析度亦達DVD級的704×480，跟機重送重量級2GBSD卡，影像品質可有XP、SP、LP三種選擇，如使用隨機的2GB卡錄影，分別可錄影25、50及100分鐘！不過價位都幾高吓，定價13萬日圓（約港幣$9,000），預計10月中在日本推出。
DVD燒碟Cam將落價
記憶體式攝錄機正處於兩難局面，行硬碟！容量大，但冇咗瘦身優勢；行記憶卡！記憶體可自由調配，可惜卡價又未平到可以幾十「激」帶出街！同班AVSales傾，問邊種記憶媒體最好，佢哋異口同聲話DVD燒碟式DV最好！點解？你用硬碟好、記憶卡好，講到底都要再燒DVD作儲存！而且放入普通DVD機又播得，「一機到位」當然慳錢好多啦！而且AVMAN收到風，DVD燒碟CAM最近來貨價平咗，有水位落價，多啲巡舖格價，隨時執到平貨。
文：AVMAN
