廣東社團總會同新界社團聯會噚日都有搞國慶酒會。由於煲呔重身處內地，署理特首許仕仁代表政府畀面，肥許喺會上同長實誠哥雞啄唔斷，睇怕都係講西九龍發展。佢兩個重一齊離開會場，啲行家問誠哥，冇咗單一招標嘅西九重有冇肉食？誠哥就話：「會配合政府嘅方案！」
人大曹宏威就左右開弓，先𡁻民主派不識時務講六四，對內地國情又唔熟悉，人哋都對六四有定案啦，之後再暗批煲呔以後唔好再做立法會訪問團團長，「行政又係佢、立法會又係佢、遲啲連區議會都係佢，曾生都應該休息吓啦！」
梁振英講嘢就啱聽啲，可能佢當年都有登報反對過鎮壓六四，所以認為六四可以提，大家應該就唔同觀點交流，中央啲領導都有充份準備啦，相信唔會影響日後溝通喎。
對於長毛投訴有國安喺內地監控佢，中聯辦主任高祀仁就堅決否認。
爆料熱線：29290000、27860099
報料傳真：26239278
報料電郵：[email protected]