《紐約時報》裁員五百人。《頭條日報》讀者人數有八十幾萬，成為香港第三名人數最多嘅報紙（據尼爾遜最新讀者調查，《南華早報》九月二十三日報道）。兩段新聞加埋嚟睇，傳媒人咪話唔會腳仔軟，將來收費報紙嘅加薪希望會喺邊度呢？達爾文之適者生存論，無論傳媒人鍾唔鍾意，已在眼前。
前五名讀者最多報紙之中，免費報紙分佔第三第四第五名；與二○○一年相比，所有收費報紙嘅讀者人數下跌（除咗《經濟日報》有輕微上升），顯示免費報紙搶去讀者，而一啲讀者睇慣免費報紙後，唔肯再用六蚊買報紙，長此以往，收費報紙只會有兩份暢銷大報繼續係大眾化報紙，其他一定要找尋自己嘅定位（niche），希望維持某一類行業、專業嘅讀者。即使兩份大報，亦須要絞盡腦汁，提升水平，捉緊香港脈搏先至會掂。
其次就係迎接潮流，諗辦法喺網上賺錢囉。《紐約時報》最近推出收費服務，有「專欄作家套餐」，試驗吓有冇讀者肯付款睇PaulKrugman、ThomasFriedman等等，專欄作家要定期與讀者網上對談、互動。好多人懷疑有冇網上讀者肯畀錢，《紐約時報》就話不妨試吓，梗係啦，既然要炒五百人魷魚，乜嘢收費辦法都要嘗試。
香港報紙之中，《信報》冇網上版，最近傳出消息，《信報》正在考慮。呢日碰到退休傳媒人、前研究員Ｃ，佢年紀不大，仍然活力十足，每日到中央圖書館睇齊報紙，慳番唔少。佢話香港啲公立圖書館，服務一流，設備先進，在內讀書睇報紙雜誌，簡直係退休人士最高享受。喺圖書館上慧訊網（Wisers），完全免費，所以搜尋資料十分容易。佢話：「《信報》冇網上版，我諗出一個方法，上慧訊網，打『信報』，關鍵字就打『的』，你知啦，張張報紙，每一版面，每一篇文章，都一定有一個『的』字，於是成份《信報》，就可以喺電腦睇到，《信報》上唔上網，與我無關！」