表面睇，恒指升130點，期指漲189點，開心嘅人多過唔開心嘅人。睇真啲，下跌股隻多過上升股隻1成，實情係散戶傷心嘅多過開心嘅。散戶炒股輸錢多，炒輪輸得更慘。身邊朋友，已經有啲發誓唔再炒輪，不過聽住先，生仔姑娘醉酒佬，遲吓手指生番，又嚟賭過。
中芯C輪：中芯（981）上周五調低第3季付運量與平均售價指引，高盛發表報告，評級係「與大市同步」，目標價1.68元。市場反應，係由1.45元散落1.31元，縮水10%。
中芯C輪一體香，死火輪上頭5隻，清一色都係中芯C輪，瀉幅由50%至64%。中芯C輪總共13隻，現價同發行價比較，講都唔信，平均跌幅高達87%。最勁跌幅嘅有4隻，蒸發剩4%，同跌晒冇分別。跌剩1仙者有4隻，同跌晒亦係冇分別。
跌得咁殘，博唔博得過？咪手痕。如果手痕，4928算係條件最靚。
恒地C輪4593：恒地（012）明日派成績表，估計唔差。C輪如果有平貨，買啲博一盅兩件，對象係4593，明年1月上旬夠鐘，輪價25.5仙，溢價3.2%，槓桿率15倍（有效9.3倍），引伸波幅24%。如果落場，雞仔注算數，咪重手。
章盛