資訊爆炸嘅年代，市民要掌握最新資訊，渠道多的是。
好似地產代理咁，唔單止幫人買賣物業咁簡單，兩間龍頭代理行中原及美聯，就連網上電視台都做埋。
中原黃偉雄話，佢哋投放一千萬搞網上電視台，登入www.cpn.com.hk，可以睇到唔少地產新資訊。每日不同時段，有四個節目環節，講各區最新情報、最新開售新盤資訊，又有名人意見分析，以及有趣地產知識。cpn噚日啟播。
另外，美聯顧國泰噚日突然宣布，「729物業專訊網上電視」下月試播，目標投資二千萬，主要用於IT配套。佢透露，請咗五個電視台主播，其中一個女主播下月返工。佢話，會以專題形式講樓市，希望做到好似樓市K-100咁樣，但係不定期鋪上網，有題目至出街。
美記及長實噚日搞記者會，其間公布呢個消息，重諗住即場搵長實高層做第一個訪問嘉賓，咁啱美記主席黃建業行過，結果俾長實趙國雄捉住，調番轉頭訪問黃主席，趙生變成客席主持㖭。
電郵地址：[email protected]