返到律師樓，Dennis主動走埋嚟傾偈。講真，自從經過上星期佢爆粗鬧嗰件事，我對佢嘅遐想已經所餘無幾。講開又講，我發覺Dennis最近好似愈來愈大隻，佢話原來最近好勤力做Gym，朝早早餐就食維他命同香蕉，搞乜嘢呀，想練肌肉？
我話畀Dennis知，其實朝早空肚食香蕉對身體唔好㗎，練唔到大隻之餘重有損身體。香蕉有大量鎂質，空肚食，血液內鎂質大幅度增加，會抑制心臟血管嘅功能。而且人體體液中鎂、鈣比例一下子大幅改變，會有肌肉麻痹、乏力又想瞓嘅感覺。以前我為咗減肥每朝食隻香蕉就算，就搞到個人好冇精神。「Dennis，記得唔好空肚食香蕉喇，尤其是揸車，如果唔係，連鬧人嘅氣力都冇喇！」Dennis好似Feel到我講緊上星期佢車我返屋企單嘢，即刻笑笑口，講咗兩句就走開。
聽日上Sabrina屋企，佢同一個叫Karen嘅朋友一齊住，兩手空空上去唔係幾好。於是打算放工去買啲禮物，點知Dennis聽到我話買嘢畀表妹，就話要一齊去幫吓眼！（七）