嘉里何文田山道15號噚日喺風雨中平頂，由嘉里執行董事何述勤，親自公布命名為「灝畋峰」，「灝」同「峰」大意即係有山有水，而個「畋」字就有啲特別，佢話呢個字解作耕田有收穫，仔細睇，再加啲英文拼音嘅元素，成個名暗藏「何文田山」。
何述勤特別提到灝畋峰高度上嘅特點，又提供資料話，界限街以南有三座山，即場畫圖示意，分別係加多利山、京士柏山同何文田山，最高點，就喺正何文田山道15號，離水平線二百一十五米，比西半山般咸道一百五十米重要高。
地勢高，最大嘅優點就係景靚。何述勤對提供嘅資料好有信心，又話如果大家發覺有錯，今日即管話佢知，如果收唔到電話，即係佢冇錯咁話。